Shërbimi Spitalor Klinik dhe Universitar i Kosovës (SHSKUK) ka ndërmarrë masa të menjëhershme pas dyshimeve për cilësinë e një produkti mjekësor në Spitalin Rajonal Sami Haxhibeqiri në Mitrovicë. Bëhet fjalë për produktin medicinal Compound Sodium Lactate Intravenous Infusion BP 500 ml, i cili është vënë nën mbikëqyrje për shkak të dyshimeve se nuk përputhet me specifikimet teknike të përcaktuara.
Pas raportimit të bërë nga farmacistja përgjegjëse e barnatores së spitalit, autoritetet ndërmorën veprime të koordinuara me Agjencinë e Kosovës për Produkte dhe Pajisje Medicinale (AKPPM) dhe Inspektoratin Farmaceutik. Më 17 qershor 2026, Inspektorati Farmaceutik kreu një inspektim fizik në ambientet e barnatores spitalore, ku përmes procesverbalit urdhëroi bllokimin e menjëhershëm të 1,432 njësive të produktit në fjalë.
Sipas njoftimit zyrtar, stoku mbetet i bllokuar deri në përfundimin e analizave laboratorike dhe procedurave vlerësuese nga institucionet përkatëse. SHSKUK theksoi se natyra e gjetjeve do të sqarohet pas përfundimit të këtyre verifikimeve, ndërsa institucioni mbetet i përkushtuar për garantimin e sigurisë së pacientëve.
Përditësime
Hetuesit kanë gjetur grimca dhe mbetje të huaja brenda shisheve të infuzionit në repartin e Kirurgjisë në Spitalin e Mitrovicës, duke çuar në bllokimin e 1,432 njësive. Produktet e kontaminuara janë furnizuar nga kompania DreniPharm. SHSKUK ende nuk ka dhënë detaje mbi datën e furnizimit ose numrin e pacientëve që mund të jenë ekspozuar ndaj këtyre njësive.