Autoriteti Kombëtar i Ushqimit (AKU) ka urdhëruar tërheqjen e menjëhershme nga tregu të produktit NAN 1 OPTIPRO 800g, loti L 51230346AE me datë skadence 30/05/2027, si masë parandaluese pas konstatimit të pranisë së bakterit cereulide.
Njoftimi bazohet në komunikimin e subjektit importues në Shqipëri, i cili i referohet kompanisë prodhuese Nestlé. Kontaminimi është zbuluar në fabrikën prodhuese në Holandë. AKU ka kryer kontrolle dhe ndjekje gjurmueshmërie, duke bllokuar të gjithë sasinë e produktit në gjendje, si dhe atë të kthyer nga tregu. Këto sasi do t’i nënshtrohen asgjësimit ose kthimit në vendin e origjinës.
AKU kërkon nga konsumatorët të mos e përdorin produktin dhe t’i drejtohen pikave të shitjes për kthimin ose asgjësimin e tij, për mbrojtjen e shëndetit publik. Nga verifikimet në terren, autoriteti ka konstatuar se njoftimi është afishuar në supermarketet ku është tregtuar produkti.
Cereulide është një toksinë e prodhuar nga bakteri Bacillus cereus, që mund të shkaktojë simptoma të helmimit ushqimor si të vjella dhe dhimbje barku. AKU po vazhdon hetimet për të identifikuar shkakun e ndotjes dhe kërkon bashkëpunim nga tregtarët për të parandaluar shpërndarjen e produkteve të kontaminuara.