Gjashtë automjete janë përfshirë në një aksident në qendër të Vlorës, pranë Postës Qendrore, më 19 mars 2026.
Sipas të dhënave paraprake, dyshohet se një automjet tip Peugeot i ka prerë rrugën një mjeti tip Volkswagen, duke shkaktuar përplasjen fillestare. Si pasojë, në incident janë përfshirë edhe automjete të tjera në lëvizje, mes tyre një mjet tip Hyundai i Prefekturës së Vlorës.
Nga aksidenti nuk raportohet për persona të lënduar, por dëmet materiale janë të konsiderueshme. Përplasja ka shkaktuar bllokim të përkohshëm të qarkullimit në zonë, duke krijuar vështirësi për drejtuesit e mjeteve.
Shërbimet e policisë kanë mbërritur menjëherë në vendngjarje, kanë siguruar zonën dhe normalizuar trafikun. Grupi hetimor ka nisur punën për zbardhjen e shkaqeve dhe përcaktimin e përgjegjësive.