Një aksident rrugor është regjistruar në aksin Hocisht-Gracë, bashkia Devoll, ku një automjet ka dalë nga rruga, është përmbysur dhe është përfshirë nga flakët.
Drejtuesi i mjetit ka humbur kontrollin gjatë lëvizjes, ndërsa në automjet udhëtonin edhe dy të rinj të tjerë. Si pasojë e ngjarjes, tre të rinj kanë pësuar lëndime, por janë jashtë rrezikut për jetën.
Menjëherë pas përmbysjes, automjeti ka marrë flakë. Kalimtarë të rastit kanë ndërhyrë dhe i kanë nxjerrë në kohë të tre të rinjtë nga mjeti që digjej.
Në vendngjarje kanë mbërritur forcat zjarrfikëse të Bashkisë Devoll, të cilat kanë shuar flakët.