Prokuroria Themelore në Prishtinë, Departamenti për Krime të Rënda, ka njoftuar ngritjen e aktakuzës ndaj Burim Kelmendit dhe N.Rr., për shkak të dyshimit për kryerjen e veprave penale "Keqpërdorimi i pozitës apo autoritetit zyrtar" dhe "Ushtrimi i ndikimit".
Sipas aktakuzës, gjatë viteve 2020 dhe 2021, Burim Kelmendi, në cilësinë e Kryeshefit Ekzekutiv të KRM Pastrimi, ka tejkaluar kompetencat duke mos respektuar procedurat ligjore. Ai akuzohet për nënshkrimin e 89 kontratave të punës, duke përfshirë 37 kontrata me afat të caktuar për pozita të rregullta në kundërshtim me Ligjin e Punës Nr. 03/L-212, pa shpallur konkurs publik. Gjithashtu, ai dyshohet se ka nxjerrë aktvendime për avancime të punonjësve duke shpërfillur rregulloret përkatëse. Këto veprime thuhet se i kanë shkaktuar buxhetit të ndërmarrjes një dëm prej 114,535.06 euro.
Ndaj të pandehurit N.Rr., koordinator në të njëjtën kompani, rëndon akuza për përfitim të kundërligjshëm. Sipas Prokurorisë, në mars të vitit 2021, ai ka kërkuar dhe pranuar shumën prej 1,500 euro nga pesë persona (J.D., M.D., A.B., G.B., dhe R.N.), duke premtuar se do të ushtronte ndikim te Kryeshefi Ekzekutiv për t'i punësuar ata.
Burim Kelmendi ishte shkarkuar nga detyra më 8 korrik 2022 nga kryetari i Prishtinës, Përparim Rama, për shkak të devijimeve nga plani i biznesit, mbipunësimit të paarsyeshëm dhe nepotizmit. Prokuroria i ka propozuar Gjykatës që të pandehurit të shpallen fajtorë dhe të dënohen sipas ligjit.