Gjykata e Apelit të Juridiksionit të Përgjithshëm ka lënë në fuqi vendimin e shkallës së parë për Mario Përlleshajn, i cili u shpall fajtor për vrasjen e të miturit Martin Cani dhe plagosjen e bashkëmoshatarit të tij, Luis Meçe.
Përlleshaj u dënua për dy vepra penale:
• "Vrasje në rrethana të tjera cilësuese" ndaj Martin Canit.
• "Vrasje në rrethana të tjera cilësuese, mbetur në tentativë" ndaj Luis Meçes.
Sipas vendimit të Gjykatës së Tiranës, që mbetet i pandryshuar, i pandehuri ishte dënuar fillimisht me 12 vite burg për vrasjen dhe 10 vite burg për tentativën e vrasjes. Pas bashkimit të dënimeve, masa përfundimtare e caktuar është 16 vite heqje lirie.
Ngjarja tragjike ndodhi më 18 nëntor 2024, në afërsi të shkollës 9-vjeçare "Fan Noli" në Tiranë, pas një konflikti midis të miturve. Pas përfundimit të seancës gjyqësore, babai i viktimës, Engjëll Cani, u shpreh se, ndonëse është arritur një lloj drejtësie, familja kishte kërkuar një dënim më të ashpër për autorin.