Gjykata e Apelit e Juridiksionit të Përgjithshëm nuk ka mundur të shpallë vendimin në seancën e datës 3 qershor 2026, në lidhje me procesin ndaj të miturit Mario Përlleshaj. Seanca gjyqësore u shty për shkak të pamundësisë së krijimit të trupës së plotë gjykuese, pasi njëri nga anëtarët mungoi në sallë.
I pandehuri Përlleshaj ishte dënuar më 9 dhjetor 2025 nga Gjykata e Tiranës me 16 vite heqje lirie, pasi u shpall fajtor për vrasjen e 14-vjeçarit Martin Cani dhe tentativën e vrasjes ndaj shokut të tij, Luis Meçe.
Ngjarja e ndodhur më 18 nëntor 2024, rreth 200 metra larg shkollës “Fan Noli”, pasoi një konflikt të hershëm mes adoleshentëve. Sipas fakteve të zbardhura gjatë procesit, konflikti kishte nisur tri ditë para ngjarjes për motive të dobëta. Ditën e vrasjes, të miturit kishin pasur një përplasje fizike në tualetet e shkollës, përpara se konflikti të përshkallëzohej pas mësimit.
Përditësime
Gjykata e Apelit ka vendosur zyrtarisht rihapjen e hetimit gjyqësor për vrasjen e Martin Canit. Trupa gjykuese, e përbërë nga gjyqtarët Fatri Islami, Enida Petri dhe Valdete Hoxha, urdhëroi kryerjen e ekspertizave psikologjike për autorin dhe të miturin e plagosur. Seanca e radhës është caktuar për datën 10 qershor.