Gjykata e Apelit ka shpallur vendimin përfundimtar për rastin e sulmit ndaj zyrave të Komisionit Komunal Zgjedhor (KKZ) në Mitrovicën e Veriut, ngjarje e ndodhur në dhjetor të vitit 2022. Përmes këtij vendimi, gjykata ka ndryshuar dënimin e të akuzuarit Dejan Pantiq, duke e ulur atë nga 2 vite në 1 vit burgim.
Lidhur me të akuzuarit e tjerë, Gjykata e Apelit ka vërtetuar aktgjykimin e Gjykatës Themelore në Prishtinë të datës 28 korrik 2025. Përkatësisht, Milun Milenkoviq dhe Aleksandër Vllajiq mbeten të dënuar me nga 5 vite burgim, ndërsa Miomir Vakiq është liruar nga të gjitha akuzat.
Sa i përket Aleksandër Vllajiqit, ai është dënuar me 5 vite burgim edhe në një proces tjetër të mbajtur më 5 qershor 2026, për veprën penale të spiunazhit, pasi ka pranuar se ishte agjent i shërbimit informativ serb, BIA.
Trupi gjykues i Apelit, i kryesuar nga Ferit Osmani me anëtarë Albina Shabani-Rama dhe Avni Mehmeti, shqyrtoi pretendimet ankimore në seancën e datës 28 prill 2026. Lidhur me ankesën e mbrojtjes së Milun Milenkoviqit, gjykata konstatoi se përshkrimi faktik i veprës penale dhe mënyra e kryerjes së saj janë të mjaftueshme për të vërtetuar formën e fajësisë, pa qenë e nevojshme përdorimi formal i termave specifikë juridikë për dashjen.