Shërbimet e Stacionit të Policisë Plazh në Durrës kanë finalizuar dy faza të operacionit të koduar "Siguria", të ndërmarra për garantimin e rendit dhe sigurisë gjatë sezonit turistik. Si rezultat i kontrolleve dhe patrullimeve të intensifikuara, policia arrestoi në flagrancë 29-vjeçarin me shtetësi suedeze, O. K., të cilit gjatë kontrollit fizik në çantën e tij (marsup) iu gjet një armë zjarri pistoletë me karikator të mbushur me fishekë, të cilën e posedonte pa leje. Arma dhe municioni u sekuestruan në cilësinë e provës materiale.
Në një rast tjetër të goditur nga të njëjtat forca policore, u parandalua vjedhja e një kasaforte murale në një banesë. Në afërsi të vendngjarjes u arrestua në flagrancë 24-vjeçari D. P., i cili dyshohet si autor i tentativës për vjedhje. Hetimet e mëtejshme çuan në identifikimin e dy bashkëpunëtorëve të dyshuar, shtetasve V. K., 38 vjeç, dhe S. I., 26 vjeç. Policia bëri të mundur ndalimin e V. K., ndërsa vijon puna intensive për kapjen e S. I.
Materialet procedurale për të dyja rastet i janë referuar Prokurorisë së Durrësit për hetime të mëtejshme. Policia e Shtetit thekson se kontrollet dhe patrullimet do të vazhdojnë me intensitet gjatë gjithë sezonit turistik.