Policia e Tiranës finalizoi operacionin e koduar “Inventari”, duke vënë në pranga dy magazinierë të një subjekti në fushën e prodhimit dhe tregtimit të kafesë. Hetimi nisi pas kallëzimit të administratores, e cila kishte konstatuar mungesën e një sasie të madhe produkti në magazinë.
Si rezultat i hetimeve nga specialistët për Hetimin e Krimeve Ekonomiko-Financiare:
- u arrestuan Altin Kenga, 35 vjeç, dhe Vasilika Kazo, 29 vjeçe, të dy magazinierë në subjekt;
- nisi procedimi në gjendje të lirë për L. B., 29 vjeç, me detyrë shpërndarës.
Nga hetimet dyshohet se këta shtetas, në bashkëpunim me njëri-tjetrin dhe duke shpërdoruar detyrat, gjatë një periudhe trevjeçare kanë vjedhur 40 000 kg kafe. Nga shitja e saj kanë përfituar 800 000 euro.
Materialet procedurale iu referuan Prokurorisë së Tiranës për veprime të mëtejshme. Veprimtaria kriminale dyshohet se është kryer duke mashtruar me faturat dhe inventaret.