Policia e Tiranës ka finalizuar operacionin e koduar “Brand 3”, të zhvilluar nga Drejtoria për Hetimin e Krimit Ekonomik dhe Financiar në DPPSh. Gjatë këtij operacioni u identifikuan 7 shtetas, të cilët në bashkëpunim me njëri-tjetrin kontrabandonin veshje nga Kina dhe Turqia, i magazinonin në Tiranë dhe i shisnin duke shmangur detyrimet tatimore.
Shtetasit u kapën në flagrancë teksa transportonin me dy automjete 17 valixhe me veshmbathje të markave të shtrenjta, të dyshuara si të kontrabanduara. Mallrat dhe automjetet u sekuestruan në cilësinë e provës materiale.
Në pranga ranë shtetasit:
• Sofokli Bushi, 69 vjeç;
• Bilbil Llangozi, 72 vjeç;
• Ali Bushati, 57 vjeç.
Ndërkohë, u nis procedimi penal për shtetasit:
• R. Ll., 45 vjeç;
• I. B., 39 vjeç;
• E. B., 23 vjeç;
• Z. M., 65 vjeç.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprat penale “Shkelja e të drejtës së pronësisë industriale”, “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Mospagimi i taksave dhe i tatimeve” dhe “Fshehja e të ardhurave”.
Hetimet vazhdojnë për identifikimin dhe kapjen e shtetasve të tjerë të përfshirë në këtë veprimtari kriminale.