Specialistët e Seksionit për Hetimin e Krimit Ekonomik dhe Financiar, në bashkëpunim me Prokurorinë dhe në zbatim të vendimit të Gjykatës, kanë finalizuar operacionin e koduar “Illegal trade” në qytetin e Tiranës. Gjatë këtij aksioni janë kontrolluar 8 subjekte tregtare që ushtronin aktivitet në fushën e shitjes së pajisjeve elektronike, veshjeve dhe aksesorëve të markave luksoze.
Sipas njoftimit zyrtar, mallrat e gjetura në këto biznese ishin të pashoqëruara me dokumentacionin përkatës që vërteton origjinën dhe zhdoganimin e tyre. Në cilësinë e provës materiale janë sekuestruar:
• 16 aparate celularë;
• 10 njësi kompjuterike;
• 1 laptop;
• 11 çanta dhe veshje të markave luksoze.
Hetimet kanë konfirmuar gjithashtu se subjektet nuk deklaronin të ardhurat reale pranë organeve tatimore. Në njërin prej rasteve është konstatuar tregtim i mallrave pa lëshuar kupon tatimor, çka ka sjellë pezullimin e përkohshëm të aktivitetit për atë biznes.
Në përfundim të veprimeve procedurale, ka nisur procedimi penal për nëntë administratorë dhe përfaqësues të bizneseve: Gj. H., N. R., S. S., A. D., B. D., A. L., A. L., K. Gj. dhe J. B. Materialet i janë referuar Prokurorisë për hetime të mëtejshme.