Specialistët e Seksionit për Hetimin e Narkotikëve të Drejtorisë Vendore të Policisë Vlorë kanë finalizuar me sukses operacionin policor të koduar “Shkolla të pastra”. Ndërhyrja u krye pas informacioneve të siguruara në rrugë operative, sipas të cilave dy persona synonin të shisnin lëndë narkotike në afërsi të institucioneve arsimore të qytetit.
Shërbimet e Policisë kapën në flagrancë dy të mitur të moshës 17-vjeçare, pranë një shkolle në lagjen “Pavarësia”. I arrestuari, banues në Orikum, u konstatua duke drejtuar një automjet pa leje përkatëse. Bashkëmoshatari i tij, banues në Dukat, është proceduar në gjendje të lirë.
Gjatë kontrollit fizik dhe atij në mjet, policia gjeti dhjetëra doza të dyshuara kokaine dhe Cannabis Sativa. Në cilësinë e provës materiale u sekuestruan lëndët narkotike, automjeti dhe tre telefona celularë. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.