Policia e Shtetit ka vënë në pranga shtetasin M. I., 24 vjeç, banues në Tiranë, në kuadër të operacionit „The last one”. Arrestimi u bë në zonën e Kamëz për zbardhjen e një sërë vjedhjesh të kryera gjatë dy muajve të fundit.
Shërbimet e Komisariatit të Policisë Nr. 5 identifikuan dhe arrestuan të dyshuarin pas kallëzimeve të marra nga shtetas të ndryshëm. Nga veprimet hetimore rezulton se M. I. ka kryer katër vjedhje konkrete:
• Më 3 mars 2026, ka vjedhur një shumë parash dhe sende me vlerë në banesën e shtetasit Xh. Sh.;
• Më 27 shkurt 2026, ka vjedhur një shumë parash dhe produkte të ndryshme në kioskën e shtetases P. Gj.;
• Më 23 shkurt 2026, ka vjedhur një shumë parash në lokalin e shtetasit A. Ç.;
• Më 2 shkurt 2026, ka vjedhur një shumë parash dhe tre aparate celularë në banesën e shtetasit A. Xh..
Policia njofton se po punohet për zbardhjen e vjedhjeve të tjera që mund të ketë kryer ky shtetas. Materialet procedurale iu referuan Prokurorisë për veprime të mëtejshme.