Një 24-vjeçar u arrestua në flagrancë më 5 maj 2026 në Portin e Durrësit, në hyrje të Shqipërisë, i akuzuar për trafik të lëndëve narkotike.
Shërbimet e Policisë Kufitare të Portit të Durrësit, në bashkëpunim me specialistët e Sektorit për Hetimin e Narkotikëve të DVP Durrës, finalizuan operacionin e koduar Parandalimi 2. Kontrolli u bazua në analizën e riskut dhe informacione operative.
Gjatë kontrollit fizik ndaj shtetasit A. K., 24 vjeç, banues në Tiranë, dhe furgonit të tij, u gjetën disa qese me rreth 3250 fara të dyshuara narkotike Cannabis Sativa, si dhe një pajisje që dyshohet se përdoret për kultivimin e bimëve narkotike. Furgoni u sekuestrua.
Materialet procedurale iu referuan Prokurorisë së Durrësit për veprime të mëtejshme. Ai akuzohet për veprën penale "Trafikimi i narkotikëve".