Policia e Tiranës ka arrestuar një 43-vjeçar në rrugën Myslym Keta, në kuadër të operacionit Bazamenti, për krime kundër mjedisit. Ngjarja u konstatua nga shërbimet e Komisariatit të Policisë Nr. 4 gjatë kontrolleve në qarkun e Tiranës, kryesisht pranë sipërfaqeve ujore.
Shtetasi L. K., 43 vjeç, banues në Tiranë, dyshohet se ka ndërtuar një kapanon pa leje. Verifikimet treguan se ai kishte filluar punimet për një objekt tjetër, po ashtu pa leje. Për më tepër, mbetjet inerte nga punimet i kishte hedhur në lumin e Tiranës, duke shkaktuar ndotje.
Materialet procedurale iu referuan Prokurorisë së Tiranës për veprime të mëtejshme. Kontrollet për konstatimin dhe goditjen e krimeve kundër mjedisit vijojnë në të gjithë territorin e qarkut Tiranë.