Forcat e Komisariatit të Policisë Kurbin, në bashkëpunim me Forcën e Posaçme "Shqiponja" dhe Seksionin për Hetimin e Narkotikëve pranë DVP Lezhë, kanë arrestuar në flagrancë 48-vjeçarin Saimir Keqi. Operacioni i koduar "Veprimtaria" u zhvillua mbi bazën e informacioneve të siguruara në rrugë operative, të cilat çuan në kontrollin e banesës së të dyshuarit në fshatin Fushë-Kuqe.
Në cilësinë e provës materiale, policia sekuestroi 776 gramë lëndë narkotike të dyshuar si heroinë dhe një peshore elektronike, e cila dyshohet se shërbente për ndarjen e dozave. Po ashtu, në oborrin e banesës u konstatuan 144 bimë të llojit cannabis sativa, të cilat u asgjësuan nga autoritetet.
Sipas njoftimit zyrtar, 48-vjeçari dyshohet se përdorte banesën e tij për të furnizuar persona të tjerë me lëndë narkotike. Materialet procedurale i janë referuar Prokurorisë, ndërsa vijojnë hetimet për zbardhjen e plotë të veprimtarisë kriminale të të arrestuarit.