Drejtorinë Vendore e Policisë Korçë ka arrestuar në flagrancë shtetasin M. M., 50 vjeç, banues në Drenovë të Korçës, i akuzuar për shpërndarje lëndësh narkotike. Ngjarja ndodhi në kuadër të operacionit policor të koduar "Drenova", të zhvilluar nga Specialistët për Hetimin e Narkotikëve në Drejtorinë Vendore të Policisë Korçë.
Në momentin e kapjes, këtij shtetasi iu gjet dhe iu sekuestrua, në cilësinë e provës materiale, një pako me rreth 104 gramë lëndë narkotike cannabis sativa. Nga hetimet rezultoi se 50-vjeçari bashkëpunonte me shtetasin K. M., alias A. M., 37 vjeç, banues në Korçë, i cili u shpall në kërkim dhe vijon puna për kapjen e tij.
Operacioni u zhvillua në zbatim të planit të masave të hartuara për vitin 2026, me objektiv parandalimin dhe goditjen e veprimtarisë kriminale në fushën e narkotikëve. Ai u bazua në informacione të marra në rrugë operative për një shtetas që shpërndante lëndë narkotike në zonën e Korçës.
Në bashkëpunim me Prokurorinë vijon puna për dokumentimin e plotë ligjor të veprimtarisë kriminale të këtyre shtetasve. Materialet i janë referuar Prokurorisë pranë Gjykatës së Juridiksionit të Përgjithshëm Korçë për veprime të mëtejshme.