Shërbimet e Komisariatit të Policisë Nr. 4 në Tiranë kanë arrestuar shtetasin M. I., 62 vjeç, i dyshuar për ndezje zjarri në një sipërfaqe pyjore brenda Parkut Kombëtar të Dajtit.
Ngjarja u raportua në fshatin Bulcesh, në afërsi të liqenit të Digës së Liqenit të Bovillës, zonë që bën pjesë në kufijtë e këtij parku dhe në Zonat e Mbrojtura Natyrore. Pas njoftimit për rënie zjarri, shërbimet policore mbërritën menjëherë në vendngjarje.
Si rezultat i veprimeve hetimore dhe operacionale të kryera menjëherë pas ngjarjes, specialistët policorë identifikuan, kapën dhe arrestuan autorin e dyshuar. Nga hetimet paraprake rezulton se M. I. ka ndezur zjarrin, duke rrezikuar përhapjen e flakëve në masivin pyjor të parkut.
Materialet procedurale i janë referuar Prokurorisë për veprime të mëtejshme, për veprën penale Shkatërrimi me zjarr i pyjeve dhe i mjedisit pyjor.
Drejtoria Vendore e Policisë Tiranë apelon te qytetarët që të mos ndezin zjarre në asnjë rast, qoftë me qëllim apo nga pakujdesia, pasi do të përballen me përgjegjësi ligjore. Policia fton qytetarët të denoncojnë çdo paligjshmëri në numrin 112, duke garantuar anonimat, reagim të shpejtë dhe të paanshëm.