Operacioni për kapjen e 39-vjeçarit u realizua nga Sektori për Kërkimin (FAST Albania) pranë Drejtorisë së Forcës së Posaçme Operacionale, në bashkëpunim me Drejtorinë Vendore të Policisë (DVP) Shkodër. Pas një koordinimi informativ me homologët spanjollë, i kërkuari u lokalizua dhe u arrestua provizorisht në territorin e Malësisë së Madhe.
Sipas dokumentacionit të autoriteteve gjyqësore spanjolle, i arrestuari akuzohet për vepra penale të kryera në kuadër të një grupi të strukturuar kriminal, me qëllim trafikimin dhe tregtimin e lëndëve narkotike. Masa e sigurisë ndaj tij ishte caktuar më datë 8 korrik 2026.
Aktualisht, Interpol Tirana ka nisur procedurat ligjore për ekstradimin e shtetasit Gentjan Handraj drejt Spanjës, ku ai do të përballet me akuzat e ngritura nga drejtësia e atij vendi.