Një autobus i një agjencie turistike ka dalë nga rruga dhe ka përfunduar në një kanal në zonën e Ishull-Shëngjinit. Aksidenti ka ndodhur gjatë mesditës së të shtunës, teksa mjeti po kthehej nga zona e bregdetit.
Sipas informacioneve paraprake, drejtuesi i autobusit kishte zgjedhur të lëvizte në një rrugë dytësore për të shmangur trafikun e rënduar në dalje të Shëngjinit. Gjatë lëvizjes në këtë segment të ngushtë, një automjet tjetër është shfaqur përballë. Në përpjekje për të shmangur përplasjen, shoferi ka kryer një manovër devijuese, e cila ka rezultuar në daljen e mjetit nga rruga dhe rënien në kanalin anësor.
Në autobus nuk ndodheshin pasagjerë, por vetëm pjesëtarë të stafit të agjencisë turistike, të cilët kanë dalë nga mjeti menjëherë pas incidentit pa pësuar lëndime. Nga kjo ngjarje janë regjistruar vetëm dëme materiale. Policia Rrugore ka nisur punën për verifikimin e rrethanave dhe dinamikën e saktë të këtij aksidenti.