Autoritetet italiane lëshojnë 7 masa paraburgimi për trafik kokaine nga Shqipëria

Autoritetet italiane, përmes Guardia di Finanza e Perugias, kanë ekzekutuar shtatë masa paraburgimi kundër një grupi të strukturuar kriminal të përfshirë në trafikun ndërkombëtar të kokainës. Operacioni u zhvillua në Foligno, provincën e Perugias në Umbria, me urdhër të Gjykatës për Hetimet Paraprake.

Hetimet, të nisura në vitin 2024 nga Njësia e Policisë Ekonomiko-Financiare (G.I.C.O.), dokumentuan mbi 50 episode trafiku droge. Autoritetet identifikuan një strukturë piramidale, drejtuar nga një shtetas shqiptar që koordinonte nga Shqipëria furnizimin dhe shpërndarjen e kokainës në Itali.

Grupi përdorte një restorant ose piceri në Foligno si mbulesë për aktivitetet dhe riciklimin e të ardhurave. Bashkëshortja e kreut të dyshuar kishte rol në komunikim dhe menaxhim financiar. Transporti kryhej me automjete të modifikuara, ndërsa shpërndarja arrinte në qytete si Perugia, Pistoia, Rimini, Montesilvano, Venecia, Genova dhe Bolonja.

Gjatë hetimeve u sekuestruan 68 kg kokainë, të fshehura në ambiente tregtare dhe objekte private, si dhe dy automjete. Një italian, Gian Paolo Coresi (48 vjeç), u arrestua në flagrancë në një piceri në Foligno.

Ndër të dyshuarit, pesë janë shqiptarë, një italian dhe një rumun. Tre persona u dërguan në burg, një u vendos në arrest shtëpiak dhe tre të tjerë janë në kërkim. Grupi përdorte kriptotelefonë, aplikacione të enkriptuara dhe pajisje kundër survejimit për të shmangur kontrollin.