Policia italiane në Reggio Emilia ka kryer në orët e hershme të 20 janarit një operacion të madh kundër trafikut të lëndëve narkotike, duke ekzekutuar urdhra paraburgimi paraprak të lëshuar nga Gjykata e Hetimeve Paraprake në Bolonjë, me kërkesë të Drejtorisë Antimafia të Distriktit të Bolonjës.
Ndaj nëntë personave u morën masa: tetë me origjinë shqiptare dhe një italian, të dyshuar për konspiracion kriminal me qëllim trafikimin e narkotikëve. Arrestimet dhe kontrollet u zhvilluan në provincat italiane Reggio Emilia, Bergamo, Brescia dhe Savona, si dhe në Francë, Spanjë dhe Shqipëri, falë bashkëpunimit me Shërbimin Qendror të Operacioneve të Policisë Italiane, Interpol-in dhe autoritetet shqiptare, veçanërisht Departamentin e Policisë Kriminale të Shqipërisë dhe Zyrën e Ekspertit të Sigurisë.
Operacioni, i koduar STURL ONE, është vazhdim i hetimeve TREXIT 2019 dhe BLACK MAMBA, të cilat në vitet 2021 dhe 2022 çuan në 35 masa kufizuese. Këto hetime zbuluan organizata kriminale në provincën e Reggio Emilias, përfshirë dy grupe shqiptare që furnizonin me kokainë grupin Rubiera me origjinë nga Magrebi.
Një organizatë drejtohej nga një shqiptar me banim në Itali, i cili që nga viti 2018 vepronte si ndërmjetës kryesor për furnizimin me drogë në rajonin Emilia-Romagna. Grupi kishte burime të mëdha financiare dhe logjistike, duke importuar kokainë, hashash dhe marihuanë nga Amerika e Jugut, Europa Veriore dhe Spanja. Lëndët transportoheshin të fshehura në kamionë me produkte bujqësore dhe shpërndaheshin në Itali.
Sipas hetuesve, vetëm në gjashtë muaj monitorimi dyshohet se u trafikuan mbi 200 kilogramë kokainë dhe rreth 1 000 kilogramë hashash e marihuanë, duke gjeneruar fitime miliona euro. Anëtarët komunikonin përmes platformës së koduar SkyECC, e çkoduar nga autoritetet franceze. Gjithsej 15 persona janë nën hetim. Gjatë kontrolleve u sekuestruan drogë, para cash dhe mjete komunikimi; në Brescia u arrestua në flagrancë një shtetas maroken me 3 kg drogë dhe 5 800 euro.
Përditësime
Policia italiane ka publikuar pamje filmike nga operacioni i ekzekutimit të 9 urdhër-arresteve.
Zhvillime të reja:
- Total 44 akuza kundër organizatës kriminale.
- Tre nga 9 të arrestuarit u gjetën në Itali.
- Operacioni Trexit 2019 zbuloi tre organizata kriminale në Reggio Emilia, përfshirë grupin Rubiera me origjinë nga Magrebi.