Agjencia e Ushqimit dhe Veterinarisë (AUV), në kuadër të Ministrisë së Bujqësisë, Pylltarisë dhe Zhvillimit Rural, refuzoi importin e një sasie prej 21.280 kg koncentrat për pije (lëng portokalli – 65 përzierje aseptike konvencionale).
Produkti eksportohej nga kompania ProdalimBV, me seli në Vierhavensstraat 30, 3029 BE, Rotterdam, Holandë, dhe importohej në Kosovë nga Laberion SH.P.K., 32 Llapi Street, Podujevë.
Pas kontrollit të dokumentacionit dhe inspektimit fizik nga Inspektorati Fito Sanitar, u konstatua se koncentrati kishte afat të skaduar. Si pasojë, hyrja e tij në Republikën e Kosovës u ndalua.
Ky vendim u mor në përputhje me legjislacionin në fuqi për sigurinë ushqimore, i cili përcakton se produktet me afat të skaduar paraqesin rrezikshmëri të lartë për konsumatorët dhe nuk lejohen të hyjnë në territorin e Kosovës.
Ministria e Bujqësisë, Pylltarisë dhe Zhvillimit Rural, përmes AUV-së, mbetet e përkushtuar në monitorimin e vazhdueshëm të zinxhirit ushqimor për garantimin e sigurisë ushqimore dhe mbrojtjen e shëndetit publik.
Përditësime
Muharrem Shahini, zëdhënës i AUV, deklaroi se koncentrat për pije kishte skaduar rreth 5 muaj më parë. Ngjarja ndodhi të enjten. Shahini paralajmëroi: "Ky produkt paraqet rrezik të madh për shëndetin e konsumatorëve".