Avokati i Kadri Veselit: Provat e ZPS-së, grumbull mbeturinash në Hagë

Në gjyqin e zhvilluar në Dhomat e Specializuara të Kosovës në Hagë më 18 shkurt 2026, avokati i Kadri Veselit, Rodney Dixon, paraqiti argumentet përfundimtare të mbrojtjes.

Ai theksoi se gjykata nuk mund të shpallë fajësi për një person nëse vendimi mbështetet vetëm në prova të patestuara dhe thashetheme, duke iu referuar rregullit 144, që ndalon përdorimin e tyre si bazë e vetme për vendim fajësie.

Dixon deklaroi se argumentet e Zyrës së Prokurorit të Specializuar (ZPS) ndaj klientit të tij janë të pabazuara dhe përbëjnë një "grumbull mbeturinash", që nuk vërtetojnë përfshirjen e Veselit në veprimtari kriminale apo praninë e tij fizike gjatë ngjarjeve të pretenduara.

"Janë 15 faqe vetëm për një pretendim, ku kemi thënë se provat e bazuara vetëm në thashetheme janë thjesht një grumbull mbeturinash", u shpreh ai, duke kritikuar mungesën e provave konkrete.

Mbrojtja ka trajtuar një nga një çdo pretendim të ZPS-së, duke i cilësuar si të pabaza. Dixon përmendi se gjatë seancës së të hënës, ZPS foli pak për Veselin dhe bëri një përpjekje të fundit për ta lidhur atë me aktakuzën, por pa ofruar kundërpërgjigje substanciale ndaj argumenteve të mbrojtjes.

Ai kërkoi verifikimin e narrativës së pretenduar si e rreme nga ZPS dhe gjetjen e së vërtetës në këtë "rrëmujë". Mbrojtja kundërshtoi pranimin e dokumenteve sipas rregullit 155 për dëshmitarët 4747 dhe 4760.

Si shembull, Dixon solli një video ku një dëshmitar raporton thashetheme për përfshirjen e Veselit, duke e quajtur atë provë të pavlerë pasi nuk është testuar. Ai shtoi se Veseli ka qenë për periudha të gjata jashtë Kosovës, ka marrë pjesë në pak takime dhe nuk ka komanduar struktura inteligjence apo qenë aktiv në Drejtoria Politike.