Pas mbrojtjes së ish-Presidentit Hashim Thaçi, avokati Rodney Dixon paraqiti deklaratat përmbyllëse për klientin e tij, ish-parlamentarin Kadri Veseli, në gjykimin e Zyrës së Prokurorisë së Speciale (ZPS).
Dixon theksoi se çështja kundër Veselit është e dobët dhe pa prova të vërteta. Ai deklaroi se ZPS mund të argumentojë deri sa të bie fundi i botës se ka prova, por ato mungojnë plotësisht.
"Prokuroria mund të argumentojë deri sa të bie fundi i botës nëse dëshiron se kanë provat kundër Veselit, por kjo nuk ndryshon që ju të nderuar gjykatës mund ta shihni tani që në fakt është një çështje e dobët kundër tij. Madje, është mosekzistenca e provave", tha Dixon.
Ai e përshkroi hetimin si përpjekje për të gjetur njëbrirëshin. Sipas tij, ZPS ka gjurmuar që nga viti 2015, kur u krijua DhSK-ja dhe filluan hetimet, diçka që nuk ekziston. "Për më shumë se pesë vjet... ZPS-ja ka gjurmuar diçka që nuk ekziston, janë munduar që të gjejnë prova për përfshirjen e Veselit në veprimtari penale", shtoi ai.
Dixon vlerësoi Veselin si rast unik në këtë gjykim, pasi nuk ka asnjë provë për përfshirje në vepër penale. Prokuroria, sipas tij, ka shpresuar kot se diçka do të dalë dhe është përpjekur në mënyrë të dëshpëruar të kapet pas çdo fjale, duke luftuar me mullin e erës, por ka mbetur duarbosh.
Përditësime
Asnjë dëshmitar nuk e akuzon Veselin për krime. Pretendimet bazohen në prova dytësore të pavërtetuara dhe thashetheme.
Emri i Veselit përmendet 260 herë në dosjen e Prokurorisë, pa kontekst kriminal.
Veseli mungonte nga Kosova gjatë periudhave të gjata të mbuluara në aktakuzë.
Ai ishte student kur iu bashkua UÇK-së dhe punoi për të parandaluar ndëshkimet ndaj civilëve përmes komunitetit diplomatik dhe zbulimit.