Avokati i Popullit, Naim Qelaj, ka deklaruar se pas aktgjykimit të fundit ndaj ish-krerëve të UÇK-së, e vetmja rrugë për rivendosjen e drejtësisë është shqyrtimi i çështjes në shkallën e dytë. Në një intervistë për Klan Kosova, Qelaj theksoi se institucionet e Kosovës duhet të jenë më të vëmendshme dhe të kërkojnë përgjegjësi për veprimet dhe vendimet e Gjykatës Speciale.
"Unë mendoj që padrejtësia tashmë ka ndodhur. E vetmja mundësi për ta rivendosur drejtësinë është marrja e një vendimi të drejtë", deklaroi Qelaj. Ai shtoi se një gjykim i drejtë nuk duhet të jetë vetëm një përfundim formal juridik, por rezultat i një procesi të pavarur dhe të paanshëm që krijon besim te publiku. Sipas tij, reagimet publike dëshmojnë se Gjykata ka dështuar në krijimin e këtij besimi te qytetarët e Kosovës.
Sipas Avokatit të Popullit, mbrojtja duhet të punojë fuqishëm në apel, ndërsa ekipet profesionale mbështetëse duhet të ofrojnë argumente konkrete për një përfundim të drejtë. "Përderisa publiku nuk është i bindur se verdikti është i drejtë, drejtësia nuk ka triumfuar as për viktimat dhe as për të akuzuarit", u shpreh ai. Qelaj paralajmëroi se, nëse dikush shpallet fajtor duke qenë i pafajshëm, pasojat do të ishin të rënda jo vetëm për të akuzuarit, por edhe për sistemin juridik e gjyqësor të Kosovës.