Dhjetëra banorë të fshatrave Marinzë, Belinë, Sheqishte, Zharrëz, Kallm, Frashër dhe Kuman protestuan paraditen e së mërkurës përballë selisë së kompanisë Bankers Petroleum. Ata deklaruan se nuk kanë marrë pagesat për qiranë e tokave që prej fillimit të vitit 2026, toka të cilat kompania i shfrytëzon për nevoja operacionale si rrugë, parkingje dhe puse nafte që nga viti 2010.
Sipas protestuesve, kompania po tenton të ndryshojë kushtet e kontratës në mënyrë të njëanshme, duke kërkuar kalimin nga pagesa vjetore në një cikël dyvjeçar dhe uljen e vlerës së qirasë për metër katror me 50%. Banorët e cilësojnë këtë veprim si të papranueshëm dhe theksojnë se qiraja e tokave përbën një nga burimet kryesore të të ardhurave për familjet e tyre.
Në rast se kërkesat e tyre nuk do të merren parasysh nga drejtuesit e kompanisë, protestuesit kanë paralajmëruar përshkallëzim të situatës. Ata kanë shprehur mundësinë e bllokimit të puseve të naftës dhe kërkesën për kthimin e tokave në gjendjen e mëparshme, në mënyrë që ato të mund të shfrytëzohen sërish për bujqësi.