Komandanti i Forcës së Sigurisë së Kosovës (FSK), gjenerallejtënant Bashkim Jashari, priti në takim një delegacion amerikan nga iniciativa America250, të kryesuar nga profesori Daniel Serwer. Delegacioni përbëhej nga profesorë, udhëheqës organizatash, veteranë ushtarakë dhe aktivistë.
Gjatë takimit, gjenerallejtënant Jashari falënderoi delegacionin për vizitën dhe përkushtimin në promovimin e Republikës së Kosovës në arenën ndërkombëtare. Ai vlerësoi partneritetin e ngushtë dhe bashkëpunimin e vazhdueshëm ndërmjet FSK-së dhe institucioneve amerikane të mbrojtjes, duke theksuar se ky bashkëpunim mbetet element thelbësor për sigurinë e vendit.
Jashari prezantoi zhvillimet aktuale, avancimin e kapaciteteve operacionale të FSK-së dhe rolin e forcës në ruajtjen e stabilitetit rajonal. Nga ana tjetër, delegacioni amerikan vlerësoi zhvillimin dhe arritjet e deritanishme të forcës, si dhe kontributin e saj në misionet ndërkombëtare.
Palët shkëmbyen pikëpamje për situatën e sigurisë në rajon dhe rëndësinë e integrimit të Forcës së Sigurisë së Kosovës në strukturat euroatlantike, veçanërisht në NATO dhe Bashkimin Evropian. Në përmbyllje, gjenerallejtënant Jashari uroi delegacionin për jubileun e 250-vjetorit të pavarësisë së Shteteve të Bashkuara, duke rikonfirmuar vlerat e përbashkëta të lirisë, demokracisë dhe partneritetin strategjik mes dy vendeve.