Në kuadër të aktiviteteve për shënimin e 250-vjetorit të pavarësisë së Shteteve të Bashkuara të Amerikës, pjesëtarë të Forcës së Sigurisë së Kosovës (FSK), përkatësisht nga njësia e Operacioneve Speciale, organizuan një aktivitet simbolik në Parkun e Gërmisë. Në këtë ngjarje morën pjesë edhe ushtarakë amerikanë, duke forcuar bashkëpunimin dypalësh.
Aktiviteti, i quajtur "Vrapi i Rreshter Majorit", u zhvillua nën moton "Run Together, Stronger Together" (Vrapojmë së bashku, më të fortë së bashku). Sipas njoftimit zyrtar të FSK-së, ky organizim simbolizon partneritetin e fuqishëm, besimin e ndërsjellë dhe vlerat e përbashkëta që lidhin institucionin e sigurisë së Kosovës me Shtetet e Bashkuara të Amerikës.
Nëpërmjet këtij aktiviteti, Forca e Sigurisë së Kosovës rikonfirmoi përkushtimin e saj në zhvillimin e kapaciteteve operacionale, si dhe në avancimin e partneritetit strategjik me SHBA-në në të gjitha fushat e zhvillimit.