Bashkimi Evropian pritet të heqë të gjitha masat ndëshkuese ndaj Kosovës të hënën, më 2 mars 2026, në takimin e Grupit punues për Ballkanin Perëndimor (COWEB) në Bruksel. Vendimi është marrë nga organet e Komisionit Evropian dhe do të pranohet nga vendet anëtare.
Masat u vendosën në qershor 2023, si kundërvajtje ndaj veprimeve të autoriteteve të Kosovës, të cilat Bashkimi Evropian, Shtetet e Bashkuara të Amerikës dhe Shqipëria i vlerësuan si njëanshme dhe të pakoordinuara, që rrisin tensionet në veri të Kosovës. Ato përfshinin kufizime financiare prej rreth gjysmë miliardi eurosh nga fondet e Bashkimit Evropian, si dhe refuzim të takimeve në nivel të lartë me përfaqësuesit e qeverisë së Kosovës.
Në fund të vitit 2025, Komisioni Evropian kishte hequr masat për rreth 50 për qind të asistencës financiare, në vlerë prej përafërsisht 216 milionë eurosh. Tani do të lirohen edhe 205 milionë euro të mbetur nga Programet e Paraanëtarësimit dhe Fondi i Investimeve për Ballkanin Perëndimor.
Heqjen e masave e kishte paralajmëruar presidentja e Komisionit Evropian, Ursula von der Leyen, pas takimit me liderët e Ballkanit Perëndimor, përfshirë presidenten Vjosa Osmani. Komisioni Evropian kishte premtuar zbatimin në pjesën e hershme të vitit 2026, duke thënë se po punon për heqjen e masave të mbetura.