Komisioni Evropian ka ndërmarrë një hap kyç në procesin e zgjerimit, duke miratuar një paketë financiare për Malin e Zi në vlerë prej gati 3.2 miliardë eurosh. Ky vendim, i ndërlidhur me nisjen e hartimit të Traktatit të Anëtarësimit, synon të lehtësojë tranzicionin administrativ dhe financiar të vendit nga statusi i kandidatit në anëtar me të drejta të plota.
Presidentja e Komisionit Evropian, Ursula von der Leyen, e vlerësoi këtë nismë si një projekt të përbashkët që mbështetet mbi meritat dhe përkushtimin e vendit. Komisionerja evropiane për Zgjerim, Marta Kos, theksoi se paketa siguron vazhdimësi në mbështetjen financiare që nga dita e parë e anëtarësimit, duke i mundësuar shtetit përfitimin nga fondet e Bashkimit Evropian dhe kontributin në buxhetin e përbashkët.
Paketa është hartuar brenda kornizës së Kapitullit 33 të negociatave dhe mbështetet në propozimin për buxhetin shtatëvjeçar të Bashkimit Evropian për periudhën 2028-2034. Sipas institucioneve evropiane, këto llogaritje bazohen në supozimin se Mali i Zi do të anëtarësohet në Bashkimin Evropian brenda vitit 2028.