Të dhënat zyrtare nga Drejtoria e Përgjithshme e Shërbimit të Transportit Rrugor (DPSHTRR) tregojnë një ngadalësim të ndjeshëm të tregut të automjeteve gjatë pranverës. Pas një fillimviti me ritme rekord, ku regjistrimet shënuan rritje me 8.4% në periudhën janar-mars, muajt prill dhe maj sollën një kthesë negative në kërkesën për mjete të reja.
Sipas aktorëve të tregut, ky frenim lidhet drejtpërdrejt me situatën e tensionuar në Ngushticën e Hormuzit. Për shkak të konfliktit në Lindjen e Mesme, anijet e transportit detar janë detyruar të ndryshojnë itineraret, duke shkaktuar rritje të kostove logjistike dhe vonesa në mbërritjen e automjeteve në Shqipëri. Këto kosto shtesë kanë ndikuar edhe në çmimet përfundimtare të mjeteve, duke ulur fuqinë blerëse të qytetarëve.
Statistikat për periudhën janar-maj tregojnë se Koreja e Jugut dhe Kina mbeten partnerët kryesorë tregtarë të Shqipërisë në këtë sektor, me 16.3 mijë mjete të importuara gjithsej, që përbëjnë 42% të totalit. Në detaje, nga Koreja e Jugut janë importuar 9,453 mjete, ndërsa nga Kina kanë mbërritur 6,838 mjete. Pavarësisht rënies së regjistruar në maj, bilanci i 5-mujorit të parë mbetet pozitiv me një rritje të lehtë prej 2% krahasuar me të njëjtën periudhë të vitit të kaluar, rezultat i performancës së fortë gjatë tremujorit të parë.