Ditën e sotme është zhvilluar seanca e radhës për gjyqin në themel ndaj kryetarit të Partisë së Lirisë, Ilir Meta, dhe Monika Kryemadhit në ambientet e Gjykatës së Posaçme Kundër Korrupsionit dhe Krimit të Organizuar (GJKKO).
Në pritje të nisjes së seancës, Ilir Meta ka zhvilluar një bashkëbisedim me deputetin e Partisë së Lirisë, Tedi Blushi. Gjatë diskutimit, Meta e pyeti deputetin në lidhje me kursin e këmbimit të euros pas operacioneve të fundit kundër krimit, ndërsa më pas e pyeti për angazhimin e opozitës. Deputeti Blushi u përgjigj duke theksuar se opozita po vazhdon protestat në shesh.
Në të njëjtën kohë, Monika Kryemadhi ngriti pyetje mbi veprimtarinë e kreut të SPAK, Altin Dumani, duke iu referuar operacioneve të fundit ku u raportua kapja e një shume të konsiderueshme parash.
Gazetarja Anila Hoxha, e cila po ndjek nga afër procesin, konfirmoi se në sallë janë të pranishëm prokurorët e çështjes, Sotir Kllapi dhe Arben Kraja, ndërsa palët po prisnin mbërritjen e trupës gjykuese për të vijuar me procedurat.