Bllokada parlamentare në Kuvendin e Kosovës po vë në rrezik serioz përthithjen e fondeve nga Bashkimi Evropian, ndërsa kriza institucionale është thelluar me paralajmërimin për zgjedhje të jashtëzakonshme. Kryeministri Albin Kurti ka deklaruar se nëse deri më 6 tetor nuk zgjidhet presidenti i ri, vendi do të shkojë automatikisht në zgjedhje, një skenar që ai e cilësoi si të panevojshëm dhe me kosto të lartë për qytetarët, duke u bërë thirrje deputetëve të gjejnë konsensus.
Kjo situatë vjen pasi bllokada parlamentare ka penguar zbatimin e 6 reformave nga 13 të planifikuara për periudhën deri më 30 qershor. Për shkak të kësaj vonese, Kosova ka humbur mbi 40 milionë euro nga shuma e parashikuar prej 90.7 milionë eurosh në kuadër të Planit të Rritjes së Bashkimit Evropian. Kryeministri Kurti theksoi se funksionimi i Kuvendit mbetet vendimtar për të mos rrezikuar fondet e dedikuara për reformat e ardhshme.
Ndërkohë, qeveria ka dorëzuar më 15 korrik raportin e parë zyrtar për zbatimin e Agjendës së Reformave, duke përfshirë 20 hapa reformues në vlerë prej 153.3 milionë eurosh, të cilat janë në fazën e vlerësimit nga Komisioni Evropian. Për periudhën deri në fund të dhjetorit, fokusi shtetëror është përqendruar te 22 reforma të tjera, të cilat kapin vlerën e 131.4 milionë eurove. Për këto reforma, është e nevojshme miratimi i 10 projektligjeve në Kuvend.
Në javën në vijim, Qeveria do të përcjellë për miratim në Kuvend tri marrëveshje ndërkombëtare për programet IPA, të cilat përfshijnë:
- Dy amendamente për projektet nga IPA 2021 dhe IPA 2022
- Marrëveshjen Financiare IPA 2026-2027
Nga këto marrëveshje, Kosova pret të përfitojë 258 milionë euro. Në total, së bashku me fondet nga Plani i Rritjes, mbështetja e pritshme financiare për qeverisje të mirë dhe zbatim të reformave për anëtarësim në BE tejkalon shumën prej 400 milionë eurosh.
Përditësime
Kryeministri Albin Kurti paralajmëroi se moszgjedhja e presidentit deri më 6 tetor do ta çojë vendin në zgjedhje të jashtëzakonshme parlamentare.