Banka Qendrore e Republikës së Kosovës (BQK) ka njoftuar qytetarët për një fushatë mashtruese që po qarkullon përmes mesazheve SMS. Këto mesazhe paraqiten si njoftime zyrtare nga bankat komerciale dhe përmbajnë kërkesa urgjente për veprim, si dhe lidhje të dyshimta që mund të çojnë në keqpërdorim të të dhënave bankare.
Sipas BQK-së, synimi i këtyre mesazheve është vjedhja e të dhënave financiare të qytetarëve. Institucioni u bën thirrje qytetarëve të tregojnë kujdes të shtuar dhe të mos bien pre e këtyre mashtrimeve. Të dhënat e kartelave bankare duhet të ruhen me kujdes dhe të mos ndahen kurrë përmes e-mailit, SMS-it apo telefonit me persona të paautorizuar.
BQK rekomandon që qytetarët të mos hapin lidhje të dyshimta, të mos kryejnë pagesa apo të vendosin të dhëna bankare përmes linkeve të dërguara me SMS. Përdorimi i vetëm faqeve zyrtare dhe aplikacioneve të verifikuara të bankave është i domosdoshëm, si dhe shmangia e regjistrimit të të dhënave të kartelës në platforma të pasigurta.
Për të rritur sigurinë, BQK këshillon aktivizimin e njoftimeve për çdo transaksion dhe kontrollin e rregullt të historisë së pagesave dhe transferave. Në rast të pranimit të një mesazhi të dyshimtë, qytetarët duhet ta raportojnë menjëherë te banka ose institucioni i tyre financiar.
Ditë më parë, Policia e Kosovës ka njoftuar për qarkullimin e mesazheve mashtruese të ngjashme, ku pretendohen rrejshëm gjoba trafiku në emër të Autoritetit të Trafikut të Kosovës. Policia ka kërkuar nga qytetarët të mos hapin vegëzat e bashkëngjitura në këto mesazhe, duke i cilësuar ato si mashtrim.