Ndeshja e futbollit ndërmjet Serbisë dhe Holandës, e zhvilluar në stadiumin “Rajko Mitiq” në Beograd, u shoqërua me thirrje në mbështetje të ish-komandantit serb të Bosnjës, Ratko Mlladiq. Sipas raportimeve të mediumit boshnjak “Oslobođenje”, një grup tifozësh në tribunën veriore të stadiumit shpalosi një banderolë kushtuar Mlladiqit, i cili është dënuar me burgim të përjetshëm nga mekanizmi ndërkombëtar për gjenocidin në Srebrenicë dhe krime të tjera kundër njerëzimit.
Sipas të dhënave, thirrjet në emër të Mlladiqit u dëgjuan edhe nga pjesë të tjera të stadiumit gjatë gjithë takimit. Media të ndryshme, duke iu referuar pamjeve të publikuara fillimisht nga portali serb “Telegraf”, theksojnë se kjo ngjarje nxiti thirrje për reagim nga ana e UEFA-s ndaj këtyre zhvillimeve.
Në fushën e blertë, Holanda arriti të fitonte ndeshjen me rezultatin 2-1 kundër Serbisë. Pas ndeshjes, avokati Luka Mishetiq reagoi përmes një postimi në platformën “X”, ku bëri një lidhje ironike mes brohoritjeve të tifozëve dhe rolit të paqeruajtësve holandezë në vitin 1995. Mishetiq u shpreh se tifozët serbë prisnin që ekipi holandez të dorëzohej, mirëpo theksoi se këtë herë lojtarët holandezë qëndruan të palëkundur duke siguruar fitoren.