Çmimi mesatar i shitjes së apartamenteve në Tiranë ka arritur nivele rekord gjatë tremujorit të parë të vitit 2026. Të dhënat e publikuara nga indeksi Keydata Albania, pjesë e Çelësi Media Group, tregojnë se çmimi mesatar për metër katror është vendosur në kuotën e 2,141 eurove, ndërsa çmimi median rezulton të jetë 2,046 euro/m². Indeksi reflekton një kombinim të të dhënave për pronat e reja dhe ato të rishitura, ku pjesa më e madhe e tregut mbështetet në këto të fundit.
Krahasuar me tremujorin e parë të vitit 2019, kohë kur nisi trendi rritës, çmimet e apartamenteve janë dyfishuar. Në vitin 2019, çmimi mesatar ishte 964 euro/m², çka përfaqëson një rritje prej 122% deri në mars të vitit 2026. Në një vështrim afatgjatë, duke nisur nga viti 2005 kur çmimi mesatar ishte 664 euro/m², vlerat e banesave janë më shumë se trefishuar.
Shtrenjtimi i pronave është vërejtur në të gjitha zonat kryesore të kryeqytetit:
• Zona e ish-Bllokut: Çmimi mesatar ka arritur në 3,003 euro/m², nga 1,574 euro/m² që ishte në tremujorin e parë të vitit 2022 (rritje prej 90%).
• Brenda Unazës së Vogël: Çmimi mesatar ka shkuar në 2,431 euro/m², nga 1,269 euro/m² në tremujorin e parë të 2022 (rritje prej 92%).
• Jashtë Unazës së Vogël: Çmimi mesatar është regjistruar në 2,022 euro/m², nga 1,056 euro/m² në të njëjtën periudhë të vitit 2022.