Raporti i CNN-së thekson se një sulm i SHBA-së në ishullin Kharg mund të paralizojë ekonominë e Iranit, duke synuar "arterien" kryesore energjetike të këtij vendi. Forcimi i pranisë ushtarake amerikane në Lindjen e Mesme, me anije luftarake, mjete zbarkuese dhe mijëra marinsave, ka nxitur vlerësime për një operacion të mundshëm për të marrë kontrollin e ishullit.
Ishulli Kharg, një rrip toke pesë milje i gjatë pranë brigjeve të Iranit dhe rreth një e treta e madhësisë së Manhattanit, shërben si qendër e furnizimeve me naftë iraniane. Skelat e tij shtrihen në ujëra të thella për supertankerë dhe lehtësojnë transportin e 90% të eksporteve të naftës bruto. Një dokument i deklasifikuar i CIA-së nga viti 1984 e përshkruan atë si "më jetësoret në sistemin e naftës së Iranit", thelbësor për mirëqenien ekonomike.
Rrugët alternative eksporti, që anashkalojnë Ngushticën e Hormuzit, konsiderohen të kufizuara dhe të patestuara në shkallë të gjerë. Në vitin 2021, u përurua terminali i naftës në Jask, në Gjirin e Omanit, por Agjencia Ndërkombëtare e Energjisë e vlerëson si jo plotësisht të besueshëm për eksporte masive.
Para çdo operacioni, anijet amerikane duhet të kalojnë nëpër Ngushticën e Hormuzit drejt pjesës veriore të Gjirit Persik, duke u përballur me dronë, raketa balistike dhe mina detare. Admiral James Stavridis vlerëson se një veprim i tillë kërkon epërsi të plotë ajrore dhe detare në një rreze të gjerë rreth ishullit, me rreziqe shtesë për anijet zbarkuese.