Dashnor Sula takon kryeinspektorët për përcaktimin e prioriteteve të reja

Pas analizës dyditore të zhvilluar në Pogradec nën thirrjen e kryeministrit Edi Rama, Inspektori i Përgjithshëm Dashnor Sula mblodhi kryeinspektorët dhe drejtorët e përgjithshëm të inspektorateve qendrore për të komunikuar objektivat strategjikë deri në vitin 2030. Takimi u përqendrua në forcimin e bashkërendimit ndërinstitucional, standardizimin e veprimtarisë inspektuese dhe zbatimin e kuadrit të ri ligjor në Republikën e Shqipërisë.

Sula theksoi domosdoshmërinë e rritjes së ligjshmërisë, transparencës dhe përgjegjshmërisë në punën e administratës. Ai nënvizoi se ankesat e qytetarëve dhe bizneseve duhet të trajtohen me efektivitet, duke shërbyer si burim kryesor për analizën e riskut dhe planifikimin e kontrolleve. Për të garantuar këtë standard, Inspektorati i Përgjithshëm do të organizojë takime periodike me strukturat qendrore dhe rajonale.

Në takimin e punës u paraqit një pasqyrë e situatës së sistemit të inspektimit:

• 106 mbikëqyrje të procedurave të inspektimit të realizuara në periudhën 15 korrik – 24 gusht.
• Rreth 400 praktika ankimore të administruara në të njëjtën periudhë.
• 48 pozicione të plotësuara në administratën inspektuese gjatë muajve mars–gusht.

Si prioritete kryesore për periudhën në vijim u përcaktuan:

• Unifikimi i praktikave inspektuese.
• Respektimi rigoroz i procedurave dhe dokumentimi i plotë i vendimmarrjeve.
• Forcimi i meritokracisë në proceset e rekrutimit.
• Rritja e përgjegjshmërisë së trupave inspektuese.

Angazhimi i institucionit mbetet drejt ndërtimit të një sistemi profesional dhe transparent, në shërbim të interesit publik.