Gjatë prezantimit të raportit vjetor nga Zyra e Inspektorit të Përgjithshëm, kryeministri në detyrë, Albin Kurti, deklaroi se sistemi i ri i inspektimeve synon modernizimin e plotë dhe rritjen e efikasitetit në nivelin qendror dhe atë lokal. Reforma bazohet në një qasje të diferencuar, ku bizneset me rrezik më të lartë apo ato që ndikojnë te një numër i madh i konsumatorëve do t'i nënshtrohen inspektimeve më të shpeshta.
Sipas Kurtit, thelbi i kësaj reforme është mbrojtja e interesit publik, përfshirë shëndetin, sigurinë dhe mjedisin. Ndaj subjekteve që shfaqin shkelje të përsëritura, inspektoratet do të ndjekin një politikë pa kompromis, duke shfrytëzuar të gjitha mjetet ligjore. Në anën tjetër, për bizneset që respektojnë rregullat, synohet lehtësimi i barrës administrative përmes listave të kontrollit të publikuara paraprakisht.
Inspektorja e Përgjithshme, Lyra Osmani, theksoi se viti 2025 shënoi progres në avancimin e koordinimit ndërinstitucional. Ajo veçoi digjitalizimin e procesit si një nga shtyllat kryesore, duke synuar një sistem transparent që zvogëlon mundësitë për ndërhyrje arbitrare, korrupsion ose keqpërdorim të detyrës zyrtare. Reforma ka ngritur gjithashtu statusin e inspektorateve qendrore në agjenci ekzekutive për të fuqizuar kapacitetet e tyre zbatuese.