Dedë Prenga, ish-zëvendës shefi i Shtabit të Përgjithshëm të Forcave të Armatosura, deklaroi në emisionin "Çdo Kënd" me Merita Haklajn se ekziston rrezik për Shqipërinë për shkak të zhvillimeve në Lindjen e Mesme dhe pranisë së muxhahedinëve në vend.
Ai vlerësoi si të justifikuar dhe të nevojshme për t’u marrë seriozisht njoftimin e ambasadës së Shteteve të Bashkuara të Amerikës në Tiranë. Sipas Prengës, reagimi fillestar i qeverisë shqiptare ishte jo profesional dhe i nxituar, ndërsa në parlament një palë e minimizoi situatën dhe pala tjetër e maksimalizoi rrezikun.
Prenga theksoi nevojën për vlerësim realist të situatës, pa nënvlerësim apo mbivlerësim. Ai përmendi sulmet kibernetike të mëparshme ndaj institucioneve shqiptare nga Irani, si dhe penetrimin në institucionet e shtetit. Gjenerali bëri të ditur se në Shqipëri janë evidentuar elementë të rekrutuar nga regjimi iranian, veçanërisht mes muxhahedinëve të MEK.
Ai sqaroi se Irani nuk pritet të kthejë vëmendjen kryesore drejt Shqipërisë për shkak të angazhimeve më të mëdha, por rreziku ekziston bazuar në fakte të mëparshme.