Zyrtarë të Dhomave të Specializuara të Kosovës janë duke shqyrtuar pasurinë dhe pronat në emër të katër ish-krerëve të Ushtrisë Çlirimtare të Kosovës, përkatësisht Hashim Thaçit, Kadri Veselit, Jakup Krasniqit dhe Rexhep Selimit. Gazetarja e Klan Kosovës, Rina Mujku, njoftoi nga Haga se ky interesim i Prokurorisë ka për qëllim verifikimin e mundësive për kompensimin e 156 viktimave pas përfundimit të procesit gjyqësor.
Sipas raportimeve, kjo çështje po trajtohet ekskluzivisht brenda kuadrit të Dhomave të Specializuara, duke mos lejuar që viktimat të zhvillojnë padi civile të veçanta në gjykatat e rregullta të Kosovës. Kjo praktikë përkon me procedurat e ndjekura më parë në rastet e Salih Mustafës dhe Pjetër Shalës, ku verifikimi i pasurive u krye për t'u siguruar nëse të akuzuarit zotërojnë të ardhura të mjaftueshme për mundësinë e zhdëmtimit. Vendimi për këtë proces të brendshëm të gjykatës është marrë që në nëntor të vitit 2025.