Rektori i Universitetit të Shkodrës “Luigj Gurakuqi”, Tonin Gjuraj, ka njoftuar largimin e tij të parevokueshëm nga detyra. Në një letër drejtuar ministres së Arsimit, Mirela Kumbaro, ai thekson se ky vendim vjen si pasojë e ndërhyrjeve të Bordit të Administrimit, të cilat, sipas tij, cenojnë autonominë universitare dhe shkelin ligjin.
Në argumentet e tij, Gjuraj vë në pikëpyetje ligjshmërinë e procesit të emërimit të administratorit të universitetit. Gjithashtu, ai shpreh rezerva për vendimet e marra në lidhje me:
- Procedurat e rekrutimit të stafit administrativ.
- Vendimet për shtyrjen e moshës së daljes në pension për punonjësit.
Në letrën e tij, rektori në largim nënvizon se mandati i tij, i cili buron nga votëbesimi i komunitetit universitar, kërkon ushtrim të detyrës me integritet, transparencë dhe respekt për autonominë institucionale. Ai shton se ndërhyrjet e tilla dëmtojnë funksionimin normal dhe vlerat e universitetit.
Tonin Gjuraj ka një karrierë të gjatë akademike. Ai zotëron një Ph.D. në Sociologji nga Universiteti i Tiranës, ka përfunduar studime postdoktorale në Kolegjin St’ Anthony pranë Universitetit të Oksfordit dhe mban një Master në Shoqëri dhe Politikë nga Universiteti i Evropës Qendrore në Pragë.