Drejtoresha ekzekutive e JPMorgan Chase, shqiptarja Lorna Hajdini, ka depozituar një padi për shpifje në Gjykatën Supreme të Nju Jorkut ndaj ish-bankierit Chirayu Rana.
Sipas dokumenteve gjyqësore, Hajdini e akuzon Ranën se ka ndërtuar një fushatë disamujore me pretendime të rreme, duke përfshirë akuza për drogim, marrëdhënie seksuale jo konsensuale dhe "skllavëri seksuale". Ajo i mohon kategorikisht të gjitha këto pretendime dhe thotë se ato janë të sajuara për të dëmtuar reputacionin e saj dhe për të përfituar miliona dollarë.
JPMorgan Chase ka dalë publikisht në mbështetje të drejtueses së saj. Banka ka deklaruar se nuk beson në akuzat e ngritura dhe se hetimet e brendshme nuk kanë gjetur asnjë provë që t’i mbështesë ato.
Nga ana tjetër, Chirayu Rana kishte ngritur më parë një padi kundër Hajdinit, duke përdorur pseudonimin "John Doe". Në atë padi ai e akuzonte drejtuesen për abuzim seksual, kërcënime dhe sjellje raciste, si dhe pretendonte se ishte kërcënuar me ulje bonusi në rast refuzimi.
Çështja pritet të vazhdojë në gjykatat e Nju Jorkut, ndërsa të dy palët akuzojnë njëra-tjetrën për dëmtim të qëllimshëm të reputacionit dhe tentativa për përfitim financiar.