Këngëtarja me famë botërore, Dua Lipa, ka inauguruar Bibliotekën Manifesto, një hapësirë e përhershme kushtuar librave të ndaluar dhe të censuruar, brenda librarisë historike Livraria Lello në Porto të Portugalisë. Projekti u prezantua në kuadër të festivalit ndërkombëtar të librit BABELL – City of Books.
Sipas artistes, kjo nismë është rezultat i një misioni shumëvjeçar për të promovuar leximin dhe lirinë e shprehjes. "Kur themelova Klubin e Librit Service95, synimi im ishte të krijoja një shtëpi për shkrimtarët dhe lexuesit, kudo që ndodhen. Leximi na afron, por fatkeqësisht jo të gjithë e shohin kështu", u shpreh Lipa.
Biblioteka përmban rreth 100 libra, të organizuar sipas katër temave kryesore:
- Pushteti
- Kontrolli
- Zëri
- Kujtesa
Në raftet e kësaj hapësire, vizitorët mund të gjejnë vepra të njohura si "The Handmaid’s Tale" e Margaret Atwood, "Felon" i Reginald Dwayne Betts, si dhe libra nga autorë si Salman Rushdie dhe Olga Tokarczuk. Sipas këngëtares, biblioteka është një vend që u kushtohet autorëve, veprat e të cilëve janë ndaluar, dhe lexuesve që besojnë se askush nuk duhet të vendosë se cilët libra lejohen të lexohen.
Përveç angazhimit në muzikë, Dua Lipa vazhdon të promovojë letërsinë përmes Klubit të Librit Service95, ndërsa është përzgjedhur edhe si kuratore e Festivalit të Letërsisë në Londër 2026, që do të zhvillohet në Qendrën Southbank.