Një dyqan bulmeti në lagjen nr. 3 të Pogradecit, pranë rrugës së spitalit, është vjedhur gjatë orëve të natës. Autorët kanë thyer me forcë derën dhe kanë zbrazur të gjithë mallin, duke shkaktuar një dëm që kalon vlerën e 2 milionë lekëve.
Vjedhja u konstatua mëngjesin e sotëm rreth orës 07:30 nga pronari, i cili gjeti biznesin të thyer dhe të boshatisur. Ky është rasti i dytë brenda pesë muajsh që ky dyqan bëhet shënjestër e hajdutëve, ndërsa autorët e të dyja ngjarjeve mbeten ende të paidentifikuar.
Policia e Pogradecit ka sekuestruar kamerat e sigurisë nga zonat përreth dhe po kryen kërkime për gjurmë gishtash brenda dyqanit. Hetimet vijojnë për identifikimin e autorëve.
Pronari ka shprehur shqetësim për sigurinë. Ai deklaroi se nuk është i qetë dhe nuk di nëse do të vazhdojë aktivitetin, pasi kjo është hera e dytë që vidhet brenda pesë muajsh.
Në të njëjtën rrugë, vetëm pak muaj më parë u vodh një argjendari, ngjarje për të cilën policia arrestoi dy persona.
Përditësime
Hajdutët morën edhe DVR-in e dyqanit. Një vjedhje argjendarie ndodhi dy muaj më parë në të njëjtën zonë.