Një ngjarje e rëndë është regjistruar në zonën e “Ujit të Ftohtë” në Vlorë, ku një grua e moshuar ka rënë nga shkallët e një autobusi urban teksa po zbriste. Përplasja me bordurën e betonit të shëtitores në Lungomare i ka shkaktuar asaj lëndime të konsiderueshme.
Sipas informacioneve, gruaja ka pësuar hematoma në pjesën e kokës, fytyrës dhe gjymtyrëve. Qytetarët që ndodheshin pranë vendit të ngjarjes kanë njoftuar menjëherë forcat e policisë dhe shërbimin e urgjencës. Ndërsa dëshmitarët në vendngjarje raportuan se ambulanca mbërriti me vonesë, e moshuara u transportua drejt Spitalit Rajonal të Vlorës për të marrë ndihmën e nevojshme mjekësore, ku vijon të mbahet nën kujdesin e mjekëve.