Policia e Kosovës ka njoftuar realizimin e dy ekstradimeve drejt vendit, në kuadër të bashkëpunimit ndërkombëtar për luftimin e kriminalitetit. Të dy personat e ekstraduar kërkoheshin nga institucionet e drejtësisë për shkak të përfshirjes së dyshuar në veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
I dyshuari i parë, shtetasi i Kosovës me inicialet M.T., është ekstraduar nga Gjermania më 12 gusht 2026. Pas mbërritjes, ai i është dorëzuar njësive përkatëse të Drejtorisë Rajonale të Policisë në Prishtinë për zhvillimin e procedurave të mëtejshme ligjore.
Shtetasi i Serbisë me inicialet I.S. është ekstraduar nga Hungaria më 13 gusht 2026. Edhe ky shtetas, pas procedurave të ekstradimit, i është dorëzuar autoriteteve policore në Prishtinë për vazhdimin e procedurave ligjore.
Operacionet janë koordinuar nga Drejtoria për Bashkëpunim Ndërkombëtar Policor (ILECU). Policia e Kosovës ka theksuar se këto ekstradime u mundësuan përmes bashkëpunimit të ngushtë me autoritetet gjermane dhe hungareze. Institucioni ka deklaruar se do të vijojë shkëmbimin e informacioneve me partnerët ndërkombëtarë për të mundësuar parandalimin, hetimin dhe zbulimin e aktiviteteve kriminale, si dhe lokalizimin e personave të kërkuar që veprojnë brenda dhe jashtë territorit të Kosovës.