Endrit Shabani, Avokati i Popullit i Shqipërisë, dhe homologu i tij nga Kosova, Naim Qelaj, zhvilluan një takim zyrtar në Shkup, më 8 prill, me Faton Selami, Avokatin e Popullit të Maqedonisë së Veriut. Takimi u fokusua në protestat e fundit të studentëve shqiptarë dhe në garantimin e përdorimit të gjuhës shqipe në arsimin e lartë.
Në cilësinë e Presidentit të Organizatës së Avokatëve të Mesdheut, Shabani apeloi që kërkesat e studentëve të mos trajtohen si problematikë rutinë administrative. Ai e vendosi çështjen në kontekstin historik dhe ligjor, duke e quajtur atë shtyllë thelbësore të shtetit të së drejtës. “Marrëveshja e Ohrit nuk ishte thjesht një instrument për të ndalur një konflikt, por një kontratë e re sociale për të ndërtuar një shtet të përbashkët e pluralist”, tha ai. “Njohja e gjuhës është respektim i ekzistencës dhe i së drejtës për t’u përfaqësuar në hapësirën publike. Procedurat administrative dhe vullnetet politike të momentit nuk mund të mbivendosen mbi të drejtat e fituara dhe të ushtruara prej vitesh. Garantimi i kësaj të drejte është test për stabilitetin rajonal dhe kusht themelor për integrimin europian të shoqërive tona.”
Selami njoftoi se institucioni i tij ka nisur një hetim me iniciativën e tij dhe ka ngritur çështjen e ligjit të gjuhëve pranë instancave më të larta shtetërore. Ai u shpreh optimist për një zgjidhje të shpejtë dhe pozitive, që do t’u mundësojë studentëve shqiptarë dhënien e provimeve të profesionit në gjuhën amtare. Gjithashtu, ai përmendi përgatitjen e një raporti të veçantë mbi përfaqësimin e shqiptarëve në institucionet publike.
Në përfundim të takimit, të tre krerët e institucioneve u angazhuan për një koordinim të ngushtë në monitorimin dhe mbrojtjen e lirive të njeriut në rajon, si pjesë e pandashme e vlerave europiane.